Newyddion

Neges murlun Rose yn magu gwreiddiau

Bydd gwaith y bencampwraig newid hinsawdd Rose Stevens yn cael ei arddangos yng Ngardd Fotaneg Genedlaethol Cymru.

Yn ystod ei blwyddyn fel pencampwraig ‘werdd’, creodd y disgybl o Ysgol Eglwys Gadeiriol Caerdydd furlun a oedd yn annog pawb i gyfrannu at ddyfodol mwy disglair a ‘gwyrdd’.

Dywedodd Rose sy’n 17 oed: “Roeddwn i yn un o chwe Phencampwr Newid Hinsawdd Cymru.

“Nod y rôl hon oedd hysbysu pobl o newid hinsawdd a’r camau syml y gallan nhw eu cymryd i helpu i leihau ôl-troed carbon Cymru.”

Mae Rose, sy’n byw ym Morgannwg, wrth ei bodd bod gan ei murlun gartref o’r diwedd lle bydd miloedd ar filoedd o ymwelwyr yn gweld ei neges yn erbyn newid hinsawdd. Bydd y murlun yn cael ei ddadorchuddio yn swyddogol yn yr Ardd ddydd Mawrth Ebrill 3.

Ychwnaegodd Rose, cyn brif ferch Ysgol Eglwys Gadeiriol Caerdydd: “Roeddwn i yn yr Ardd ar gyfer Gŵyl Start lle bues i’n ddigon ffodus i gwrdd â Thywysog Cymru, un o uchafbwyntiau fy mlwyddyn fel Pencampwraig Newid Hinsawdd. Rydw i mor bles bod fy murlun yn cael ei arddangos yn yr Ardd Fotaneg brydferth, lle y bydd pobl yn meddwl am y tirlun a sut mae’r hinsawdd yn effeithio ar ein byd.”

Roedd Peter Davies, Cadeirydd Comisiwn Newid Hinsawdd Cymru, yn clodfori gwaith Rose. Dywedodd: “Dyma enghraifft arbennig o effaith creadigol y Pencampwyr Newid Hinsawdd. Dyma ffordd anarferol ac arloesol o drosglwyddo’r neges ynglŷn â phwysigrwydd mynd i’r afael â newid hinsawdd.”

Dywedodd Dr Rosetta Plummer, Cyfarwyddwyr yr Ardd Fotaneg Genedlaethol: “Pleser yw cael y murlun yn yr Ardd. Rydyn ni’n mynd ati o ddifrif i gefnogi Siarter Cynaliadwyedd Cymru ac rydyn ni’n credu’n gryf mewn trosglwyddo’r neges bod planhigion, bioamrywiaeth a’r adnoddau a ddefnyddiwn yn gwneud gwahaniaeth allweddol i genedlaethau’r dyfodol.  Mae’n wych gweld y neges hon yn cael ei throsglwyddo mewn ffordd mor weledol a dirgrynol.”

Gwelwch y murlun o ardal chwarae’r plant a bwyty’r Ardd, a bydd yn cael ei gynnwys yn Nhaith Gynaliadwyedd boblogaidd yr Ardd.